趣趣地：高路普笑住拍
紅軍兵玩Overcooked

利物浦領隊高路普可能係煮食電子遊戲《Overcooked！2》嘅粉絲，所以要一班練習賽落敗嘅球員齊齊整餅。輸家華基爾雲迪積克、拿比基達、安德魯羅拔臣同史杜列治周三練完波後走入廚房，穿上圍裙，喺靚女營養師監督同指導下，整蛋糕畀班隊友食。

入廚房整蛋糕，好似只有雲迪積克同羅拔臣似番少少樣，尤其戴上頂寫住主廚帽嘅雲迪積克，係咁指揮其餘幾個人要點樣做，而史杜列治同拿比基達兩位，就喺旁邊切吓橙皮、紅蘿蔔同加吓砂糖、調味咁，平時場上踢波負責衝鋒陷陣，家陣喺廚房就變大茄。或者基於睇人落難最開心，專登走去睇整餅嘅文尼、法明奴同高路普，仲食花生咁款用電話拍低四人手忙腳亂嘅場面。