行街唔識路，最多都係兜多幾圈，但揸車唔識路，就可大可小！讀者陳先生周二晚7點幾，行過鍾屋村輕鐵站對開，見到一部載客紅的，駛近紫翠花園對開燈位，轉綠燈後，本應轉左，但的士竟飆咗去前面，直鏟上去輕鐵路軌，嚇到陳生「嘩！」咗聲，乘客落車仲笑笑口，「佢（司機）想倒後，我叫佢唔好倒後啦，條胎出晒煙，快啲落車啦！」
的士一時間無法離開路軌，令輕鐵列車埋唔到站，正值放工時間，乘客頗多，都「焗住」喺車廂等。陳生最後見的士由拖車吊離路軌，列車始恢復行駛，事件擾攘約半小時。警方表示當晚7時39分，姓郭（65歲）司機駕駛載客的士，沿青山公路行駛，其間誤入輕鐵路軌，最後由港鐵職員帶領他離開，事件中沒有人受傷。據悉，有人對警員表示「唔熟路」肇禍 。