明年就係區議會選舉，各黨派都磨拳擦掌密密落區揼石仔，之但係吸收人哋經驗都好重要，近年大力進攻地區嘅公民黨，派咗一班後生仔去台灣取經，觀摩九合一選舉候選人嘅布陣，仲專程同國民黨、民進黨同時代力量三黨美女小花交流……心得啫。副團長兼油尖旺區議員余德寶話，要睇人哋點樣喺冇資源之下打逆境戰，「香港民主派正正係咁㗎嘛」。
為區選取經 學打網絡戰
公民黨一行廿幾人本周一起赴台北進行四日三夜考察，重點觀察台灣候選人點樣部署，備戰明年區選，除咗拜訪戰國策董事長吳春城，考察團又分別同當地美女生力軍，包括國民黨徐巧芯、民進黨吳沛憶及時代力量曾柏瑜會面。余德寶話，最大收穫係睇到當地候選人點樣靈活運用通訊軟件連繫選民，佢話日後除咗facebook宣傳外，亦要恒常化使用WhatsApp群組，「要教埋長者點樣用通訊軟件」。
余德寶又話，台北市長柯文哲嘅成功，反映白色力量冒起，「有第三勢力揀」，佢覺得香港傳統民主派政黨面對同樣問題，面對地區組織透過網上動員崛起，再返落社區嘅模式，網絡戰更要積極。但3.11九西補選，民主派姚松炎被指落區唔夠鎩羽而歸，區選齋打網絡得唔得？隨團嘅九龍東地區發展主任鄭文杰就話，今次都有留意台灣候選人紮實嘅地區工作，讚對方利用唔同衞星組織target唔同組群，連繫性更強。
李八方