有「港獨之父」之稱嘅前特首梁振英，日前突然又喺facebook提港獨問題，話𠵱家係「理論港獨」階段，必須以理論反駁。689呢篇挑機文引嚟港大法律系副教授戴耀廷撰文回應，話佢都同意𠵱家應就港獨進行理論大辯論，更向689下戰書，希望同689同場辯論港獨問題，仲反挑689有冇膽量同佢辯論。
689係fb用FCC請陳浩天出席午餐會件事做引子，話港獨以溫水煮蛙手法宣傳，又話𠵱家係「理論港獨」階段，扎根之後就會「枝繁葉茂」，所以現在就要用理論反駁。佢仲燒埋戴耀廷，話當年戴喺報章發表呼籲佔領中環文章，社會都冇諗過一年幾後會發展成一場曠日持久佔中運動！
「不知梁先生有否膽量」
戴耀廷噚日出文反擊，話689都認同目前港獨只在理論階段，即係根本冇人用實際行動去搞港獨喇！又話如果689認為現在係進行港獨理論大辯論嘅時候，佢樂意奉陪，喺公開場合同689討論有關港獨的問題，仲反問「只是不知道梁先生有否這膽量」。不過戴耀廷知689為人，所以戴定頭盔，強調自己多次撰文討論港獨，只係分析港獨而非推動港獨，明顯怕有人借此屈佢支持。