歐洲球壇最頂級賽事嘅歐洲聯賽冠軍盃，一眾豪門終於亮相嘅分組賽會喺下月開打，今晚會進行抽籤。香港球迷最關心嘅，係今屆正賽有冇直播睇，有又喺邊個電視台播，睇嚟開始有啲眉目。
今晚抽籤，「現在台」嘅頻道會進行直播，相信今屆歐聯賽事直播權都係佢哋擸埋，不過，現在台到截稿時表示，仍未有相關消息。（now638台今日11:30pm起直播）
now：未有相關消息
抽籤會喺香港時間周五凌晨0:00am開始，過去幾屆歐聯同歐霸盃賽事都係由另一收費電視台「畸寶」提供，照情況睇嚟緊呢屆嘅播映權可能有變。現在台旗下嘅頻道，喺今季已經有提供英意西法德五大聯賽直播，仲有美職聯同阿根廷甲組聯賽等比較冷門嘅賽事。
阿積士靠歐聯附出線
講番歐聯抽籤，歐洲足協喺今屆賽事又有新規則，包括五大聯賽在內一共26支球隊，唔需要踢外圍賽同附加賽直入分組賽，剩番得六個席位。周二先進行三場歐聯附次回合賽事，AEK雅典同傳統勁旅阿積士雖然都和局收場，但靠首回合嘅勝果，齊齊打入分組賽。同日另一場瑞士嘅年青人作客克羅地亞薩格勒布戴拿模，喺半場落後0:1劣勢下以2:1反勝，兩回合計以3:2淘汰對手，相隔32年首次打入歐聯正賽。完成埋周三餘下三場歐聯附次回合，分組賽全部32支參賽球隊就齊晒。
今晚進行歐聯抽籤，一如以往會以歐洲球會系數排名分成四個檔次，上屆冠軍皇馬、歐霸盃盟主馬體會，加埋上季五大聯賽冠軍球隊及莫斯科火車頭，都列第一檔，其中巴黎聖日耳門嘅王牌尼馬就話唔希望會同舊東家巴塞隆拿碰頭：「我同幾乎所有巴塞舊隊友都仲有聯絡，好掛住佢哋，但希望唔好係以對手身份碰面。」PSG同巴塞都係第一檔次球隊，至少唔會喺分組賽交手。上屆亞軍利物浦就排第二或第三檔，要等埋周三歐聯附最後三場比賽至定到。