離地係政客嘅罪過之一，是故政客要落區，了解民間疾苦，唔知最近有乜事件令立法會民政事務委員會有感悟，準備喺10月2日走入「凡間」，體察一下「天上人間的故事」？八方講嘅其實係上個月開始，喺香港文化博物館展出嘅「數碼敦煌──天上人間的故事」。呢個展覽係文化博物館今年嘅重點，入面有過百件關於敦煌文化嘅展品，例如第一次喺香港展出、以1:1複製西魏時期嘅二八五窟壁畫同埋塑像，同埋仲有以數碼技術重現嘅四十五窟、二五四窟等。
立法會民政事務委員會噚日發通告，安排10月2日下午3點去文化博物館，委員先會同民政局局長劉江華見面，然後參觀二八五窟，再用VR技術體驗四十五窟等等。嘩，有得了解敦煌文化，又可以體會創新科技，仲有得同劉華談心，節目咁豐富，唔知有幾多議員有興趣呢？