「我哋係講道理，唔係搞事，我哋要fight for the best。」如此壯志豪情，唔係出自工會老鬼，而係一班90後空姐空少。港龍航空公司空勤人員協會換屆，11名理事，7個新人，6個90後，平均年齡30歲，年輕就係本錢，敢言敢做，更有承擔，「如果有要求就應該要付出，唔係得把口講」，90後工會理事黃嘉敏（Carmen）說。
「令我搵番熱誠」
港龍工會每次換屆都頭痕，搵接班人不易，主席施安娜發電郵告急，一班90後挺身撐工會。大學讀社工系嘅Carmen當上空姐後，沒忘記追求公義，「唔係返工放工咁過日子」；葉楚茵（Nancy）亦指入職多年，原以為稜角已磨蝕，考慮一個月後決定加入，「令我搵番熱誠，肩負一份責任」。
好多人誤以為工會只搞罷工，關淑媚（Kate）唔同意，佢話工會非搞搞震，係要為合理待遇據理力爭。原任職香港快運嘅張慧婷（Angela）過檔港龍後，深明工會嘅重要性，因為舊公司冇工會，「公司講乜就講乜，冇得say no」。
工會注入新血，其中最年輕理事、年僅22歲嘅「小鮮肉」林奇謙（Kim）善用社交媒體同會員聯絡，留意到唔少空服員鍾意喺facebook「Secret Page」留言，表達不滿，佢不時留意帖文同跟進。7名新人中，黃瑋婷（Jo）屬80後，聽見工會告急，即挺身力撐，「唔係淨係賺人工，亦要為大家爭取最好福利」，好似延長退休年齡就係佢關注嘅其中一項重要議題。