嶺南大學學生、前學民思潮成員黃子悅早前質疑嶺大宿舍政策涉歧視情緒病患，話自己去年因情緒問題休學一年及退宿，求醫後病情改善，醫生都證明適合復課，但嶺大舍堂要求佢提供病歷，黃子悅話病歷屬私隱，唔明白點解要提供自己嘅病歷。
病歷風波 校方開會探討
事件隔咗十幾日，終於有曙光，黃子悅噚日喺facebook公佈，佢終於成功入宿，攞到「林護堂」嘅鎖匙：「終於終於拎到房匙了！！！！嗚，好感動 ，原來有得入宿係咁幸福嘅事……校內平機會9月頭會就相關事宜／學校政策開會探討，詳情我仲問緊。」佢仲拎住條鎖匙，開開心心自拍咗張相上載分享。
黃子悅喺留言中特別鳴謝咗一大班朋友，唔少都係嶺大嘅同學仔，比較特別嘅係佢同時鳴謝來自民主黨嘅靚女大律師吳思諾（Senia），唔通今次Senia有份幫手？八方有搵Senia問佢內情，但佢到截稿仍未有回覆。