最近接連幾日都橫風橫雨，花草樹木風吹雨打後容易倒塌，噚日凌晨都落咗成晚雨，至朝早9點幾，元朗一條村一棵大樹突然有樹枝塌下，擱喺行車線同行人路上，部份樹椏枝葉擊中泊喺路邊兩部私家車，阻擋住附近一帶嘅人車去路。
現場係元朗丹桂村路菁雅居對開，讀者提供嘅相片睇到，一條近4米長嘅樹椏倒塌，部份樹枝斷唔晒仲掛喺樹上，好似一道綠色屏障咁。斷枝橫越成條馬路同行人路，好彩路段唔算多人流，所以冇人受傷。不過，有兩部停泊喺路邊嘅私家車同七人車就冇咁好彩，俾斷枝扑到應一應，但就未見有太大損毀，擋風玻璃都無碎裂迹象，算係不幸中之大幸。
消防員接報到場視察，判斷後決定鋸斷樹椏清理現場，先開通道路，稍後時間再移走斷枝。