皇家馬德里周日憑賓施馬喺下半場取得兩個入波同加里夫巴利交出一傳一射，作客以4:1反勝基羅納。
開波17分鐘皇馬失守，阿歷斯加西亞幫主隊射成1:0。不過，馬高阿辛斯奧其後喺禁區內畀蒙尼沙踢跌博到12碼，沙治奧拉莫斯操刀射入追成1:1。換邊後，阿辛斯奧畀皮利龐斯侵犯，再度幫皇馬博到12碼，賓施馬喺52分鐘主射入網，拎到個人喺今季西甲嘅首個入波，幫皇馬超前到2:1。59分鐘，巴利接應艾斯高傳波，再憑速度壓過對方防守球員殺入禁區，冷靜咁幫皇馬射成3:1，連續兩場聯賽有「士哥」。到80分鐘，巴利助攻賓施馬射成4:1。皇馬最終以4:1反勝基羅納，同衞冕嘅巴塞都係西甲兩戰全勝，皇馬憑較佳得失球排喺榜首。