前特首梁振英上周五再向理大應用社會科學系助理教授鍾劍華同《立場新聞》發律師信，告佢哋誹謗，鍾劍華噚日係facebook貼出689律師寄畀佢嘅法律文件，即係話689已正式開始司法程序入稟。鍾劍華日前已講明同689鬥到底，但打官司係燒錢玩意，鍾劍華肯定唔夠689錢多，幸好守護公義基金出手，將搞籌款支援佢嘅法律開支，實行集結民間力量對抗689。
po法律文件預備打持久戰
鍾劍華噚日喺fb貼出一堆律師信，話終於收到文件，會先同律師朋友傾，但自己立場清楚堅定，有心理準備打場持久戰，又話已向守護公義基金會提出支援，仲會考慮眾籌。
至於守護公義基金噚日宣佈信託人改組，同埋為鍾劍華籌款，發言人鄭宇碩對689告鍾劍華同《立場新聞》表示遺憾，認為威脅香港言論同新聞自由，由於鍾劍華正式向佢哋求助，而鍾又係基金信託人，為免利益衝突，鍾決定退出，工黨前立會議員何秀蘭就加入成為新信託人。基金成立至今已籌得超過1,200萬，扣除DQ案同佔中九人案嘅律師費，仲有約636萬，呼籲市民繼續支持佢哋，捍衞香港核心價值。
李八方