新一季英超已經進行咗三輪賽事，三戰全勝嘅球隊唔多，車路士就係其中一隊。車仔周日作客紐卡素一度陷僵局，到末段先互有入波，最終車仔2:1險勝對手全取三分。車仔今場入波助攻都冇左閘馬高斯阿朗素份，但佢喺兩球波都佔極大功勞，佢亦係踢咗英超目前其中一位最搶鏡嘅左後衞。
2:1險勝紐記
車仔呢場要到76分鐘先出現第一個入球，先靠馬高斯阿朗素博得12碼，再由夏薩特主射先開紀錄。到83分鐘，紐卡素由祖斯盧辛馬田扳平，但四分鐘後戰況有變，阿朗素發威勁射，可惜射門被紐記守將耶迪連改變方向入網，官方認定係烏龍唔入佢數。雖然阿朗素今場數據上冇入球冇助攻，但功勞一啲都唔細！
新帥沙利今季嚟到車路士，季前有部份人唔睇好佢，點知季初成績比預計好，三戰贏晒。沙利賽後話：「我從未見過賓尼迪斯會排五後衞陣式，每一支球隊嚟到呢度作客對佢哋都唔易應付。夏薩特今場表現好出色，其實佢應該只踢75至80分鐘，但當時高華錫表示要退下火線，所以佢無奈要踢足。」
英超列強左閘搶fo
英超已經踢咗三輪，唔少強隊嘅左閘表現都好搶眼，阿朗素三場有一入球一助攻，最重要係車仔三戰全勝。另一出色左閘有曼城嘅班捷文文迪，藍月三場波見佢喺左路快上快落，側擊好強勁，至今已經有三次助攻。其餘搶鏡左閘仲有利物浦嘅安德魯羅拔臣同屈福特嘅賀利巴斯等，後者數據上仲出色，入一球貢獻兩次助攻。
阿朗素自加盟車路士後表現一直提升，被視為近兩年英超最佳左閘或左翼衞。有咁大進步，阿朗素最應多謝前領隊干地，之前兩季車路士用3-4-3陣式，阿朗素充當左翼衞充份展現進攻才華，今季沙利復用四後衞陣式，阿朗素變返左閘一樣冇問題。阿朗素喺一星期前對阿仙奴射入致勝球，今場對紐記繼續發揮極強效率，每次中場有波分邊嘅時候佢都及時趕到。統計唔呃人，車仔至今三場入八球，阿朗素直接或間接參與咗當中六球。