港人經常網購，如果有24小時速遞中心就好喇！科學園同精銳動力科技有限公司合作，喺科學園裏面設立全港首個全自動智能機械人速遞中心，提供自助取件同儲存服務，由機械人將貨架同儲物櫃運嚟運去，幫大家儲存或取件。
機械人速遞中心佔地約5,000呎，貨架數量95個，裝到1,140件貨品。精銳動力首席執行官周定漢話，無人操作系統可以節省同處理時間，用戶只須輸入手提電話號碼同物流公司畀嘅密碼，1分鐘內就拎到包裹。佢哋𠵱家已同超過10間物流公司合作，包括中通快遞、FedEx等。
速遞中心仲有存放服務，仲用面部識別技術，提升保安水平。科學園話有存放一星期、一個月或幾個月計劃，但下個月先公佈費用。速遞中心下個月就畀業界試用，之後就開放畀公眾。