街工早前有出走潮，2007年當選葵青區議員至今嘅黃潤達係其中一個出走者。1980年出生嘅阿達同八方憶述，「曾經諗住喺街工一世㗎」，但有突如其來嘅事令佢呢場人生馬拉松偏離原路線，佢強調唔係離開跑道，只係同伴轉咗，路線方向冇變，走得幾遠就幾遠。
畢業後入街工 曾諗住一世
以跑步論政途，可見阿達幾熱愛跑步。雖然同原被認定嘅師傅、街工立法會議員梁耀忠已各行各路，但佢愛上跑步都同阿忠有關。佢憶述2008年健康變差、BMI超標，就聽阿忠建議跑步強身。2010年首度參加渣馬10K時仲係肥仔，越跑越有興趣，2015年仲去咗台灣跑全馬。
阿達成長歷程不斷自我增值，做嘢時喺理大社工系畢業，𠵱家仲喺嶺大讀緊文化研究碩士。
佢話細個讀書唔叻，會考後冇得喺觀塘官立中學直升，要轉去觀塘功樂官立中學讀，雖然係外校生，但組莊選學生會兼一擊即中，城大讀社工副學士時與同學力爭副學士宿舍，仲不時參加社運，2002年城大畢業搵工，想落腳民間團體或議辦，為基層同勞工服務，「我send咗信畀民協同街工，街工請，一入就咁多年，曾經諗住一世㗎」。當年點解由職員轉戰選區議員？「當時做議助要學嘅嘢差唔多，猶豫應該跳返出去做社工定參選呢？」最後聽阿忠意見一試，唔知稍後嘅政途又會有乜發展？
■記者許偉賢
