兩個女乘客前日朝早疑因車資問題，同的士司機當街拉址，兩女戰一男，雙方越嘈越激動，講講吓仲互相出手。有街坊見到即時勸交，但一時間未能平靜到雙方情緒，最後有個霸氣女街坊喝令雙方放手先至控制場面。
事發喺將軍澳健明邨，前日朝早7點幾，有兩個女乘客懷疑同的士司機就車資問題爭拗，雙方互相捉住大家。司機大叫一聲：「你打我吖！」引爆雙方情緒。其中一個短髮女乘客首先出手，拍向司機肩部，司機即揮臂還擊，另一長髮女乘客亦踢向司機，大家互有碰撞。有街坊見勢色唔對，出言勸阻「唔好打人」，不過冇乜效果。
後來一個霸氣阿姐大無畏行上前，大聲喝令雙方「放手先」，成功令三人冷靜落嚟，司機仲即時話「我聽你話」，兩女乘勢出口鬧司機亦被霸氣阿姐叫「你唔好嘈」，最後一錘定音：「報警睇吓邊個啱邊個唔啱。」圓滿解決事件！