城中鬼馬盛事「鼠戰中環」噚日朝早舉行，立法會議員繼續同傳媒組隊出賽，今年傳媒代表方面有唔少資深傳媒人如記協主席楊健興等，同民建聯周浩鼎、工聯會麥美娟及民主黨鄺俊宇齊齊上陣。當中最年輕嘅鄺神跑第一棒，可能平時詩情畫意浪漫慣，據知鄺神起步時好禮讓，攝唔到靚位突圍，一出閘就有少少落後。跑第二棒嘅麥美娟平時豪邁慣，怕且唔係禮讓派嘅，但佢揀咗以淑女打扮上陣，捐吹氣障礙物時顧得造型顧唔到速度，當然繼續落後。
周浩鼎扮Batman
據聞噚日全隊焦點落喺守住最後一棒、為搏阿仔一笑而以Batman Look上陣嘅周浩鼎身上，雖然接棒時落後唔少，但好似有神力咁起勢追，最後52隊中以中游成績衝線，唔係包尾收場。查實阿鼎平時喺立法會做嘢，有時唔食lunch都落街跑一轉；佢同八方講都係盡力跑，勝負係其次。