早前美國國會屬下嘅「美中經濟與安全審查委員會」發表報告，入面引用舊年11月美國雜誌《外交政策》報道，話全國政協副主席、前香港特首董建華所創立嘅中美交流基金會，或涉及中國統戰活動，雖然舊年相關報道出街時，基金會已經否認，但所謂今時不同往日，有政界中人認為，今次美國國會嘅報告，勢必影響基金會同老董喺美國嘅唱好中國工作，隨時會影響埋老董𠵱家嘅政治地位。
或失政協副主席
唔少民主派人士噚日都關注有關報道，其中一個人話，名義上就話係美國國會引用傳媒報道，其實代表國會認同有關觀點，敦促行政機關做嘢，好似2014年美國眾議院外交事務委員會喺聽證會「隊」孔子學院威脅美國大學學術自由，之後美國政府及各大學就開始針對孔子學院做嘢，所以今次國會針對老董同佢個基金會出招，相信美國其他研究單位、大學甚至政治人物會識睇路，日後唔再咁輕易同佢哋合作，以免被視為同中共有關係。
呢個民主派中人又話，一直有傳老董以自己可以幫習近平打美國關係，所以做到80歲都唔使喺政協副主席個位度退落嚟，但佢聽到有內地人同佢講，自從特朗普上場之後，老董呢個美國通已經唔多通，𠵱家仲畀美國國會開埋名，等如再冇幫中共手搞統戰嘅價值，咁習仲有冇需要留佢做政協副主席？好多民主派等睇事情發展，究竟係美國出手郁老董個基金會先，定北京要佢老人家快快功成身退先？
李八方