揚言捍衛議會六十歲以上人士有權被代表的大叔，風雨過後，雨傘摺埋，依然有碇企。這時刻，必然全力跟鬼鬼祟祟自封大使的，比拼健康，顯示自己老而彌堅。大使挑機藐大叔，有人陪你落區殺蚊先算。嘿咻，落重本賣殯儀車頭大相宣傳，難道比得上三十多年的又傾又砌？30年醇，人和蚊都還未瞓，登革熱，大叔又有乜好驚呢。大叔與蚊，互相蚊聲細氣傾吓，白紋伊，當係千頌伊，將蚊當做女朋友，被佢咬兩啖，發點燒，身痕四五日啫。大費周章，將蚊血建築在你的選票上，抄陳智思金句：好蠢啊！至於搵深水埗明燈明哥，大叔慢了一步，被對手搵咗先。但老薑暗笑對手性急，不懂慎入，迷失在一條窄巷中，只有一個人識窿路，施丹急轉，窄路掉頭，永續落場，冇話對家，多年的戰友都未必識呢招超技術！
泛民補選，失守九西，顯見建制已成功承傳福袋掌心雷。西裝老馮，咪等人行埋，大方宣佈去馬啦。憑他一條窄巷，假如終極完勝，真的要讚，逆流大叔好戲！