周日嘅意甲第二輪迎來矚目戲碼，喺基斯坦奴朗拿度（C朗）主場「地標」之下，祖雲達斯憑比真歷同埋文迪蘇傑建功，最終以2:0擊敗拉素，取得聯賽兩連勝。
上半場11分鐘首先出現具威脅攻門，比真歷後場傳失，將個波送畀拉素前鋒恩莫比尼，後者再傳畀禁區頂位置嘅魯歷起腳，祖記門將施捷斯尼僅僅撲出。19分鐘祖記有黃金機會，貝拿迪斯治右路傳中，C朗跳起差啲頂中。到30分鐘祖記終於打破悶局，貝拿迪斯治右路傳出高波，拉素守衞解圍變助攻，比真歷喺25碼位置右腳窩利得手，領先1:0完半場。到63分鐘祖記獲得罰球，C朗主射省中人牆，之後再接應傳中頂斜，70分鐘又有一腳精采笠射，但都係無功而返。75分鐘C朗接應傳中甩腳變助攻，文迪蘇傑執雞射入空門埋齋，最終以2:0取勝。