求驗客手記：「沙灘」險勝升班馬
巴塞兵嬲到飛起 - 求驗客

上周六西甲第二輪賽事，衞冕嘅巴塞隆拿作客升班馬華拉度列幾乎失分，事關主隊球場嘅草地質素差劣，唔少草坪被鏟起，嚴重影響巴塞發揮，最終憑奧士文尼迪比利下半場一箭定江山，加上主場補時嘅失波俾視像助理裁判（VAR）推翻，巴塞先拎到開季兩連勝咋！

VAR救巴塞一命

話說華拉度列喺幾日前先至重鋪草坪，但草地情況仍唔多理想，唔少球員好似蘇亞雷斯、佐迪艾巴踢踢吓都要停低，將凸起嘅草坪重新填平，咁樣嘅草地情況，當然對一向擅長地面進攻嘅巴塞造成影響喇！其中美斯全場只錄得一腳射門，好在巴塞都識變通，57分鐘哨牙蘇左路傳中，尾柱嘅沙治奧羅拔圖頭槌將個波頂回禁區，無人看管嘅迪比利起腳射入，幫巴塞領先1:0。踢到83分鐘，阿蘇嘅入球被判越位在先；去到下半場補時主隊基高頭槌頂入，以為主隊可以喺巴塞身上搶分之際，球證喺VAR協助下發覺越位在先判入球無效，結果巴塞以一球險勝。
賽後巴塞將帥當然鬧爆球場草地質素喇！其中今場第300次喺西甲上陣嘅碧基，直頭話呢個球場係一個恥辱：「今場係喺田裏面踢嘅比賽，甚至會令球員有受傷風險，希望相關負責人正視吓喇！」布斯基斯就話：「西甲賽會冇人願意嚟睇吓球場情況，呢度同沙灘冇分別！」而教練華維迪亦認同場地影響球員發揮，希望擬將西甲搬去美國踢搞國際化嘅賽會，先關注球場問題，而賽會都話會調查一下。

馬體會法國三子晒世盃

至於另一場馬德里體育會今季主場第一擊，賽前球隊核心兼法國世界盃冠軍功臣基沙文，拎住世界盃冠軍大力神盃入場，連同兩名法國國家隊隊友盧卡斯靴南迪斯及湯馬士林馬，率先入場接受球迷嘅祝賀。未知係咪因為大力神盃嘅庇佑，今場面對升班馬華歷簡奴雖然踢得幾辛苦，但都憑基沙文喺63分鐘門前射入，幫馬體會小勝一球。