作為車主，收到「牛肉乾」當然唔happy，唔少人遇到阿sir抄牌時，都希望酌情處理速速開車走人，民主黨大埔區議員區鎮樺日前遇到類似情況，但佢話被警員惡言相向，及後喺facebook公告事件，唔止無人撐，反而惹嚟網民圍插，鬧佢知法犯法。
指抄牌警員態度惡劣
區鎮樺前日凌晨喺facebook發帖，話去沙田碩門邨入單張期間被警察抄牌。佢話本身都接受抄牌嘅，因為的確違泊，但覺得負責抄牌個警員態度惡劣，引述對方指「差人做嘢唔使你教」，所以打咗去搵警長投訴，同時喺facebook發洩，點知個po好快就俾交通群組轉載，一下子引嚟幾百網民留言，有人話：「禁區泊架車走咗去，違法就係違法，你呢啲垃圾議員用咁多時間去投訴做埋呢啲無謂嘢，反省吓啦你。」另有人斥：「使唔使請你食飯先抄牌啊，大議員。」
八方問過區鎮樺，佢強調由始至終無反對過抄牌，「我會承擔法律後果」，但指抄牌時警員係唔係一定要態度惡劣呢？佢話唔少市民都投訴受到警員不禮貌或過份態度對待，作為區議員遇到呢啲事唔會唔出聲，否則只係縱容。佢話出得個po預咗有人討論，唔會刪，亦會向沙田警區指揮官跟進警員態度問題。