韓國7人男團GOT7早前展開世界巡迴演唱會，前晚在香港亞博館舉行巡演的最後一站，香港成員Jackson更High到除衫騷肌，辣㷫全場。
搬劇上台
GOT7前晚準時開騷，除了現場來自各地粉絲捧場外，據知成員有謙、Bam Bam及JB的家人都有來港撐囝囝。GOT7在粉絲的尖叫聲中出場，以勁歌熱舞《Hard Carry》打頭陣，Jackson盡地主之誼不時以廣東話冧港迷，開場即說：「我哋又返嚟喇，準備好未啊？」其他成員都有大晒廣東話及普通話，不時講：「開唔開心啊？」、「正唔正啊？」、「我愛你」等，又多次行到延伸台前近距離與粉絲接觸。
GOT7特地將其中一個VCR環節整到劇集一樣，內容講述一對情侶冷戰，粉絲立即入戲用韓文大叫「分手」。同時又準備小分隊舞台，Jackson即場除衫晒肌肉，引得全場粉絲尖叫不斷。未知是否港騷是巡演尾站，GOT7都十分感觸，當唱到《Thank You》時，珍榮一度眼濕濕，大會之後播出粉絲準備的片段，令GOT7相當感動。
互玩淋水
安哥時，Jackson以廣東話說：「我哋第一次嚟香港開騷時，係呢度嘅三分一舞台，之後每次嘅舞台都越嚟越大，直到今日個台就大到好似《MAMA音樂頒獎禮》嘅size，其實冇諗過可以開到咁大，係多得粉絲嘅支持先做到。」GOT7承諾會再訪港開騷，叫粉絲不要變心，7子在台上跑來跑去，更興奮地互相淋水，齊齊濕身，而Jackson又多次向台下粉絲潑水。另外，一向迷韓星的鄭裕玲（嘟姐）前晚亦有捧場，她更在後台被Jackson攬實合照，嘟姐自爆是第一次睇K-pop騷，大讚GOT7表現出色，同時又讚Jackson十分sweet。
採訪：文凱靈
攝影：林賓尼