拜仁慕尼黑上周五雖喺德甲新季主場贏賀芬咸3:1，打開勝利之門，但法國翼鋒京士利高文被賀芬咸嘅尼高舒侯斯攔截時受傷要退下火線，證實左足踝韌帶綜合撕裂，預料要休戰幾星期。今場係拜仁新帥尼高高華上任後嘅首場德甲，球隊喺23分鐘由湯馬士梅拿頂入領先1:0完半場，賀芬咸下半場由施沙拉爾射追成1:1，拜仁及後分別由羅拔利雲度夫斯基同洛賓建功，順利開齋。