今日係農曆七月十四，除咗相傳係鬼門關大開之時，亦係頻頻喺面書發文、狙擊外國記者會（FCC）的前特首689農曆生日。唔知為應節，定生日前夕特別有Mood，上周六起停咗發文鬧FCC的689，噚日又無視娥特叫大家無謂轉移焦點，認為FCC會址、租約、租金，唔係陳浩天FCC演講爭議的核心問題的官方講法，繼續就FCC會址問題死咬唔放，仲話要「提醒」FCC管理層、會員同準備加入的新會員，FCC有可能失去現有會址。
發文「警告」會員
689噚日呢篇以〈外國記者會會員不能忽視失去目前會所的可能性〉為題的文章，話FCC認為邀請陳浩天演講，係行使言論和新聞自由，「既然如此，該會日後一定會以同樣理由，邀請其他分裂國家人士，包括台獨和藏獨分子到該會演講」，話呢類活動明顯違反《基本法》，「中國人民絕對不會接受」。
因為「行李門」事件自稱頌昕爸爸被批評濫用特權嘅689，噚日又發表「特權論」，指FCC無需經過公開程序取得會址，唔係一般權利，而係特權，「這個特權不可能繼續」，揚言：「可以預見在2023年，當目前的租約屆滿，會有其他組織表示對租入該會址的興趣，會要求和外國記者會競標競投」喎。不過張建宗以署理特首身份，喺本月中見記者時話，特區政府同FCC有非常友好的關係，表明現在同將來都唔會考慮同FCC終止呢種關係，署理特首講得咁清楚，689呢番偉論，唔知又幾有代表性？