晨早起床清新開朗，唔少老人家都習慣晨運完去酒樓嘆番杯茶、食個包，係幾悠閒寫意㗎。不過，因乜解究呢位阿伯晨咁早就躁底，仲搞到同酒樓女侍應互掟茶壺，上演酒樓擂台呢？嚇親一班飲早茶嘅老人家就唔好啦。
潑茶踢下陰
呢間位於沙田禾輋邨商場嘅酒樓一向人山人海，前日朝早7點9左右已經坐滿人，但人多混亂，一位單獨嚟幫襯嘅光頭四眼阿伯，同一位阿姐搭枱飲茶時，未知因何緣故同一位酒樓女侍應嘈交。由酒樓前員工提供嘅閉路電視片段睇到，女侍應一開始同光頭阿伯講到好勞氣，仲四次伸手指向阿伯，掃跌嘢落枱。光頭阿伯嘈嘈吓就施襲，大戰正式開始！
阿伯拎起茶杯掟向女侍應，對方亦不甘示弱，快手拎起另一個杯將茶潑向阿伯，互相贈興。附近茶客見開戰即刻走避，咁參戰兩方你掟吓我茶杯，我掟吓你茶壺，光頭阿伯最終竟然擸起茶壺兜頭車落去女侍應度。一時間茶壺變武器，喺場內讓茶壺飛。一位黃衣阿伯見場面失控，行埋去從後抱住光頭阿伯，再拉住唔畀佢擸凳掟人；酒樓另一位「架兩」女侍應亦加入勸交，而戰敗女侍應乘機掟多個茶壺後閃人，氣氛暫時緩和。
但唔夠兩秒鐘，架兩女侍應竟然激動起上嚟，趁光頭阿伯被箝制時加入戰團，使出撩陰腳踢向光頭阿伯下陰。光頭阿伯激到爆炸，即時喺地下拎起茶壺繼續發動攻勢，狠狠哋兜頭扑落架兩阿姐，之後就氣沖沖咁行埋一邊，但手上仲拎着茶壺，結束呢場大戰。一班茶客睇到呆晒，真係食唔飽都嚇飽。
警方回覆查詢時表示，一名63歲姓歐男子與姓朱（44歲）及姓藍（50歲）酒樓女職員發生爭執，案件列作刑毀，暫未有人被捕。酒樓姓葉負責人指唔清楚事件經過，不便評論，兩名女職員噚日朝早未有返工仲休息緊。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。