曼聯今季英超脫腳，踢到第二場已經遭逢首敗，輸畀牌面實力唔強嘅白禮頓。隊波成績唔理想，但球會嘅價值似乎冇受影響，股價節節上升。不過球會幾值錢對魔迷嚟講都係冇意思，據報佢哋已經將矛頭指向球會行政總裁活華特，打算又出動私人飛機，喺下月聯賽拉橫額表示不滿。
股價一年間升四成
曼聯球會嘅股票喺周二紐約股票交易所價格一度升上每股24.2美元，相當於18.75鎊（約190港元），最終報23.1美元，較一年前嘅價位高出百分之40，當時紅魔股票每股價值僅16.5美元。曼聯喺過去兩季都錄得破紀錄高逾五億鎊收入，即將喺下月公佈嘅第三季度業績，預計亦會達到5.75至5.85億鎊嘅水平。
球會股價升，似乎球迷嘅怒火都一樣升緊。英媒報道，曼聯球迷對於球隊喺呢個夏天轉會窗嘅表現相當不滿，仲將矛頭直指球會行政總裁活華特，認為佢買唔到中堅畀領隊摩連奴，仲打算喺下月頭作客般尼場波，租用小型飛機喺球場上空拉橫額，宣洩對佢嘅不滿。據報曼聯球迷租用嘅飛機將會拉起「ED OUT──LUHG」嘅橫額，意思即係「活華特走人──愛曼聯──憎格拉沙」，有指原本呢個計劃係喺下周一主場對熱刺嘅比賽進行，但因為燈光管制嘅關係，小型飛機唔可以喺夜晚飛，所以魔迷就將計劃順延一場，到九月二號作客般尼先做嘢。上次有魔迷僱用小型飛機喺球場上空橫額係2014年，當時紅魔仲係由莫耶斯執教，橫額寫住「WRONG ONE──MOYES OUT（錯誤嘅一個──莫耶斯走人）」。
山神狂操或復出戰熱刺
除咗股價升，曼聯仲有另一個好消息，上場英超因傷缺陣嘅前鋒阿歷斯山齊士（圖），日前喺ig上載操練緊嘅影片，或者可以喺對熱刺場大戰復出。