王敏德與馬詩慧所生的23歲細女王麗嘉，被外界評為「王家最強基因」，身高5呎11吋，現回流香港，嘗試學媽媽做模特兒及時下流行的KOL工作。要進軍香港市場，先要「淨化」外界對她「剝衫癮」的觀感，我行我素的她日前受訪時，認為香港人太保守。
撰文：梁錦雯
攝影：林德雄
化妝：Chi Chi Li
髮型：Ken Hui of ii Alchemy
服裝提供：Dior、Versus、Kenzo、Basics for Basics
場地提供：Madame Fu（中環大館）
王麗嘉擁有父母的「最強基因」，對於別人的讚評，她笑言：「樣多啲似爹哋，其他嘢係一個mix。」對於父母的形象，會否是yes daddy與tiger mommy的組合，她就表示：「幾靚仔，funny搞笑，媽咪覺得佢縱我哋，不過我哋要乜都畀我哋，係yes daddy，媽咪嚴唔嚴就睇邊方面，讀書嗰時就會嚴啲，但其實佢嘅standard都唔係好高，我哋三個讀書都幾差，如果佢唔push，就會勁唔掂。」
15歲就去了美國讀書，大學時揀過讀室內設計、藝術、社會學，最後就讀廣告畢業：「我覺得讀乜冇所謂，好多人讀呢個科，都唔係做番嗰啲嘢，所以我覺得有興趣啲就揀咗advertising。做model、KOL，因為自己覺得唔係好適合坐喺office，唔可以對住電腦咁耐，我鍾意郁吓，細個曾經講過一定唔會做model，因為以前好怕醜，唔鍾意喺鏡頭面前，但越大就多啲機會做呢樣嘢，就鍾意。」
胸大多麻煩
Google「王麗嘉」三個字，彈出最多、話題性都是圍繞她愛在Ig貼火辣超性感泳衣相，大騷32D上圍及9頭身比例超長腿，新聞標籤會有「漏奶」、「冇衫着」、「剝衫癮」等，王麗嘉也有曾為網友留言指她醜樣、似變性人等人身攻擊而不開心：「覺得自己唔係好性感，係我個胸大，所以啲人覺得我着乜都係，香港好international，都見到好多人冇戴bra，但係佢鍾意講我，我冇乜所謂，唔會改變呢種風格，已學識咗人哋望我，着衫我覺得最緊要舒服，所以我舒服，我都會着。」
自小到大出到街被人「掃」望，她已成習慣：「細個時由腳望上，𠵱家係調番轉，由上面望番落下面，同埋我幾高，啲男人由我胸口位勁近咁望，好似成世人未見過人有胸咁，如果香港係太保守，啲人應該唔好望。」其實，王麗嘉性感的程度，更曾令王敏德在她的Ig貼文叫收斂，她笑言：「我去泰國，佢叫我影啲性感相，已經接受咗我係鍾意影呢啲相，你就繼續影。」自言胸部「大咗少少」的她，數年前曾揚言想做「縮胸」手術，「因為呢嚿嘢唔係好方便，我有好多衫想着，着得唔靚又寒背，𠵱家都想做，等啲科技好啲，我唔想整疤痕喺個身度。」因身形「大」過人，令她想設計泳衣，「我自己買泳衣好難買，比例唔係好似普通人，所以我想做一條swimwear line，係啱我同其他人。」
拍拖就結婚
胞姊王曼喜敢愛出櫃，王麗嘉亦自言拍拖無數，但現在是空窗期，更覺香港難覓對象：「高度係一個問題，香港冇乜靚仔，我𠵱家standard係好高，因為我就嚟要結婚，所以我下一個男朋友係我老公，要搵個啱嘅男仔拍拖，唔會嘥時間。」對於揀另一半要求，「要好笑，因為自己好鍾意笑，關心我、要幾聰明，我想要小朋友，所以佢都要想有小朋友。」擇偶要求不少，但自問不港女，「好多時港女睇有幾多錢、做乜工，obviously，個男仔要有一份幾好嘅工，但我自己都想有啲錢先，唔會靠個男仔，我獨立，𠵱家嘗試唔問爹哋攞零用要獨立，我覺得有自己錢係幾開心，想做乜就做，唔使靠人。」