香港地人多是常識，但人多要互相禮讓就唔係個個識。有網民前日上載影片到社交網站，一個着制服疑似新巴車長嘅男人，喺紅磡海底隧道巴士站同排隊等車乘客激戰，雖然片段只有十幾秒，但雙方拳拳到肉，絕無欺場！
短片顯示，一開始就見到個疑似車長由一架新巴走落車，揮拳向正在排隊嘅一個男乘客施襲，雙方隨即打起來，各自使出連環拳，雙手撲向對方面部，但疑似車長似乎技勝一籌，連續幾拳都打中對方，並順勢將嗰個男人打倒地上，搞到佢袋都飛埋出嚟，疑似車長仲未夠喉，葉問上身一手按住對方個頭，再整多一拳落去先至罷休。
嗰段短片並冇講幾時發生，新巴就回應話仍然調查有關事件。有網民就感慨香港人越來越大壓力，小小事就出手打架，亦感嘆其他人袖手旁觀，唔嘗試制止。