資助香港學生到外國讀書嘅香港卓越獎學金計劃昨舉行頒獎禮，83位學生獲頒獎學金，其中兩位女學生熟口熟面，樣貌相當標致兼且面善，原來係公民黨前立法會議員、「總舵主」陳家洛兩位孖女千金陳靜琳（Maja）同陳靜彤（Kaja）。
細孖倫敦學傳媒傳訊
特首林鄭月娥致辭時仲提到，今年係首次有獲獎學生能夠到法國學府就讀，講緊嘅就係大孖Maja，因為佢會去法國時裝藝術高級學院修讀時裝設計及創作學士課程，細孖Kaja則去英國嘅倫敦大學金匠學院修讀傳媒及傳訊文學士。兩個囡囡咁出色，八方梗係要訪問兩女之父陳家洛。家洛話兩個女修讀嘅都係佢哋嘅首志願課程，例如大孖對藝術好有興趣，今次入到嘅係殿堂級院校：「佢平時喺學校啲展覽作品，已經有人買。」Ｍaja家吓已經努力學緊法文，準備遠赴巴黎入學。
挾着好成績，呢對17歲孖女冇走去讀醫、讀law，陳家洛話喎，由細到大教女嘅原則都係畀佢哋自由發揮，興趣導向，喺課外活動方面，作為家長，佢只係配合小朋友嘅選擇：「畀佢哋發揮，咁先可以畀佢哋事半功倍，當然都要佢哋好努力咁去考試，亦都考得好好……（會唔會逼佢哋學嘢？）逼？邊有得逼㗎？」
兩個女申請獎學金，但阿爸係民主派，有冇擔心因為自己嘅政治立場影響阿女「攞船」機會？有四女一子嘅家洛話絕不擔心，因為佢二女綽寧Natalia，去年一樣攞咗呢個獎學金去英國布里斯托大學讀戲劇與英文文學士。佢話，孖女最初申請獎學金時擔心嘅唔係呢樣，而係擔心「兩個只能活一個」，點知最終雙雙成功。
李八方