躁底哥想食包，唔通米奇又想食？麥當勞屯門鄉事會路分店，前晚有老鼠出沒，嚇到一班客人大聲尖叫，職員更加要閂門圍捕，但最終都畀佢走甩咗。
根據鄭先生提供嘅片段，店員嘗試以掃把及膠桶驅趕及圍捕老鼠，但米奇好敏捷，走向餐廳中間，之後試圖衝出大門，但被已關上嘅玻璃門所擋，米奇惟有不停更改逃跑方向，店內嘅顧客爭相走避，有個女客人仲高聲尖叫，情況非常混亂。
身手敏捷成功突圍
雖然閂咗大門捉鼠，但有客人離開嗰陣，大門都會打開，而隻米奇左揳右捐之下，竟然銷聲匿迹，店員翻開所有椅子，都搵唔到佢嘅蹤影，搞咗十幾分鐘都無結果，相信米奇已經成功逃脫，「走晒啲冷氣，都捉唔到隻老鼠」。
鄭先生話以往間中會光顧呢間麥當勞，覺得衞生一般，「始終喺馬路邊」，經過今次就對餐廳印象再打折扣，日後寧願幫襯其他餐廳。
麥當勞發言人回應話，屯門新墟餐廳前晚曾發現有老鼠蹤迹，有關餐廳已即時跟進並委託了滅蟲公司於前晚為餐廳進行消毒的工作。