高鐵、港珠澳大橋分別於今年內通車，雖然外界對政府話兩項基建可以帶來無限商機，好多人仲係半信半疑，但其實唔少商界信到十足，已經部署好諗住食大茶飯，好似海洋公園前兩日就宣佈，為求食住高鐵、港珠澳大橋通車個勢，計劃推出結合交通同入場門票嘅旅遊產品套票，仲有6個月內可入園兩次嘅套票，又會喺深圳成立代表處，進一步加強華南地區同粵港澳大灣區宣傳工作。
海洋公園行政總裁李繩宗就話睇好高鐵、港珠澳大橋通車後，可以吸引更多內地客，特別係同香港車程喺6個鐘以內嘅內地城市，仲希望連福州、廈門、長沙和武漢等較遠城市旅客，都可以因為高鐵通車後，多咗嚟香港，不過自由行落實咁多年，想嚟又有能力嚟香港嘅內地客基本已吸晒，高鐵、港珠澳大橋仲可以吸到幾多新客呢？