世界真係難撈，家陣連天文台都要拍咁多片嚟宣傳。是咁的，天文台早幾日前喺fb上載咗一條宣傳天氣雷達嘅短片，片中男主角阿寶相當面善，原來就係幾年前喺《警訊》入面，飾演借電話畀女神嘅毒男。今次天文台翻炒舊橋，仲順便幫阿寶脫毒。
《警訊》喺3年前推出「偷電話騙案」短片，片入面阿寶一見到女神話要借電話，就毫不猶豫借咗畀女神，而女神梗係一去冇回頭。呢次輪到天文台召喚番阿寶出嚟，阿寶再次喺街上遇到女神借電話，又再次毫無猶豫咁借畀人，女神連問都唔使就知道阿寶部電話嘅密碼係心形，果然人類總係要重複同樣嘅錯誤。
就喺女神用緊阿寶部電話嗰陣，阿寶居然唔係望住女神，而係上天文台網站睇天氣，天文台科學主任仲教阿寶點睇天氣雷達。最後發現呢位新女神唔係騙子，仲提醒阿寶唔好再咁易借電話畀人，話埋畀阿寶知佢姓雷之後就走咗。呢個時候拎住把遮嘅科學主任現身話就嚟落雨，鼓勵阿寶拎埋把遮畀女神，故事就完咗。