民建聯對於LGBT同志平權嘅政策一直都傾向保守，不過八方發現民記觀塘區議員張姚彬竟然喺橫額上明目張膽話要幫LGBT做法律諮詢，唔通佢咁大膽違反黨中央意思？非也，張姚彬同八方講，其實係製作公司出錯，會盡快更換橫額，但佢強調即使有LGBT居民求助都會照幫，有需要亦都會向政府反映佢哋嘅意見喎。
有網民發現張姚彬一張介紹辦事處「一站式服務」嘅橫額上，免費法律諮詢字句配上寫住LGBT嘅書仔，事件即時引起同志團體嘅關注，更加喺網上瘋傳。
八方即時向張姚彬查詢，張姚彬同八方講，張橫額係由製作公司設計，而助理都冇睇清楚，令「免費法律諮詢」變「LGBT法律諮詢」。由於引起咗不必要嘅誤會，佢決定叫製作公司更換橫額，又多次重申自己做區議員「好簡單」，只係想服務居民。