特區政府同上海市政府會喺後日舉行滬港合作會議第四次會議，同時有簽約儀式。據知政府喺儀式後會舉行午宴，除咗邀請建制派議員，今次仲首次邀請民主派議員見證，獲邀嘅包括會計界梁繼昌、教育界葉建源、法律界郭榮鏗同民主黨主席胡志偉等。而除胡志偉外，其他3人都決定出席午宴。
八方分別問過梁繼昌同葉建源，兩人證實獲邀出席簽約儀式兼午宴。葉建源話，以佢所知政府係第一次邀請民主派出席有關活動，形容安排都算係「有啲特別」。而佢自己係以教育事務委員會副主席嘅身份獲邀，認為只係「食餐飯，無乜所謂」，所以答允出席。
梁繼昌就話嘞，據佢所知泛民同建制都有議員獲邀，佢早前已向當局打聽過相關活動只係會講財經事務、專業服務等，唔會涉及「出賣香港」，所以答應出席，佢唔評估點解政府無請全體泛民議員，強調唔會因為食餐飯而唔鬧政府，「有錯都係照鬧，嘢都係照做」。