在周星馳電影《喜劇之王》中，哪一個角色令你印象最深刻？尹天仇、柳飄飄、杜娟兒、洪爺？還是臨記阿頭霞姨呢？電影自1999年上映後，那班參加「喜劇之王訓練班」的學員已各散東西，當中李思捷、林子善加入娛樂圈拼搏至今，偏偏形象深入民心的「霞姨」，卻消失得無影無蹤。
「息影」將近20年，近日霞姨再次現身於一個月餅廣告，不單令人懷念，還勾起大家的集體回憶。這天《蘋果》終於找到霞姨真身，眼前的她，一頭短髮，深色長袖恤衫配襯深黑色牛仔褲，在廟街近公廁的占卜檔口，她正在整理檔口的枱椅，即使你是《喜劇之王》fans，走過檔口看到也認不出來她就是霞姨。霞姨甫坐下便說︰「我冇做霞姨好耐，我叫阿B。」
撰文：羅婉玲
攝影：葉君海
但求與星爺合照
回帶到從前，20來歲的阿B參加「喜劇之王訓練班」，原動力只為影一張合照，「我純粹係因為偶像周星馳，我只係想見吓佢真人影張合照，報紙登咗個好大嘅訓練班廣告，咪走去排隊interview，到我面試都唔知要準備啲乜，問我準備咗乜，我話有嘅有嘅，其實係冇，我咪瞓落地拉住導演李力持隻腳話︰『你收我啦！你收我啦！』」
順利成為訓練班一員後，最初被派演群戲中的舞女，由於要化濃妝，當時正職做保險的阿B不太方便，她向當時《喜》片統籌田啟文（田鷄）提出，「有冇啲唔使化濃妝，擔擔抬抬都冇問題。隔咗一日，叫我上公司試鏡，當時仲有林子善、李思捷同Sunny哥，叫我哋做番嗰段中六合彩、老婆生仔、阿仔死咗嘅戲，唔知點解要我哋喊，我又喊得出。」之後阿B被派演霞姨一角，「人哋畀個角色你做，咩角色都好，仲唔仲唔𦧲飯應，托塔都得啦！總之有得參與，同偶像朝夕相對就得」。
那時與林子善、李思捷甚至女主角張栢芝，相處沒分彼此，「我哋成班都係新人，又係同學仔，大家相處得好開心，一齊拍戲、做宣傳對住幾個月，冇一個人會蝦你，大家有講有笑。」眾人中，阿B唯一聯絡至今的只有田鷄，形容跟對方亦師亦友。
這位「一戲演員」沒有想過，今時今日「霞姨」一角仍未被淡忘。人生不用多，一次她已很滿足，「冇諗過會咁持久，當時有人同我講︰『畀個角色你做，醒你！』我都唔明點解。演路人甲乙丙，邊有朵，但你有朵喎！幾多人恨都恨唔到，自己冇預料到，但求有參與。」
「霞姨」這角色，隨着《喜》片完結，她的星途也隨之完結。「點解唔做呢行？一睇就知冇才華，又冇身材，咁多同學叻過我咁多，自己已經好幸運，由始至終我都係為咗張合照，其他都係bonus。」
廟街檔到樓上舖
沒有延續「霞姨」的故事，阿B選擇做回自己。當時她任職保險從業員，本身對風水命理感興趣，由興趣班到跟師傅學藝。那時師姐的一個建議，令她的事業扭轉乾坤。她常說︰「你可以話我唔準，但唔可以話我呃你！」阿B坦言做過不同行業，金融、飲食、製衣、導遊甚至司機也做過，她的人生歷練，不比娛圈中人少，「當時做咗保險10年，人生梗係有高有低，師姐見我份工做得唔開心，叫我喺師傅呢個廟街檔，擺多張枱椅就得，初初我只係兼職咁做，日頭返工，夜晚開檔」。
2004年阿B開始在廟街擺檔做塔羅牌占卜師，「我第一個客係男仔，我好記得。我坐咗成晚都冇客，12點幾想收工，嗰男仔揸電單車嚟到，佢話同女朋友拍拖4年分咗手，買咗條鏈唔知送唔送到畀對方，之後佢就喊，我自己都好愕然，我叫佢唔好喊要堅持，同佢講你有權繼續愛佢，但唔代表人哋會接受，做好自己事業先。」
篤信風水命理的阿B，深信命運是有安排。有次一位太太要求占卜「到會」，她膽粗粗到酒店跟對方見面，「嗰位太太問我識唔識八字批命，我話識，但當時冇架生，之後再約佢做，就係咁呢位太太係我做命理嘅第一個客，之後我就喺商場租舖做命理，檔口就做塔羅占卜。」
來找阿B的客人，大抵都有「不能說的秘密」，不能跟朋友、家人、同事說，只好跟阿B這位陌生人說。「大部份客人，傾談完都舒服咗，（好似心理治療？）當然我唔可能百分百認同，好似有啲客係小三，有啲客有婚外情，佢哋好難同人哋講，可能係廉價心理治療師，但我未去到義工咁偉大」。
有沒有客人認出她是「霞姨」？「有，當然有，但我唔認，我話︰『嗰個唔係我』。（為何不用「霞姨」這個生招牌？）主要係身份上嘅認同，自己已經脫離咗呢個角色，你（指客人）嚟嘅目的係咩呢？你係為占卜而嚟，唔係為霞姨而嚟，你睇我檔口從來都冇擺相，我就係B. Lee。」
既已脫離，何故又回歸？事隔19年，阿B再次演繹「霞姨」，現身月餅廣告，「人總會有迷失嘅時候，有日有人打畀我，佢話原來你係霞姨，佢嚟睇過我，大家傾返我記得佢。其實咁多年都有啲公司打畀我，問我拍唔拍嘢，我都推咗，（何解今次應承？）因為對方係自己個客。」
廣告中，阿B需要駁髮，穿上橫間T恤演回霞姨，「老咗！造型、化妝真係幫到手，都幾驚。現場仲有幾個男仔，睇返好似當年嘅自己，廿年前嘅回憶返晒嚟。」在阿B的人生中，「霞姨」已作為最美好的回憶，起碼喜歡周星馳電影的觀眾，總會想起「霞姨」這個小人物。
與死神擦身而過
霞姨在《喜劇之王》中，經常對着演尹天仇的周星馳說︰「我唔知你做乜！」但阿B很清楚自己做緊乜。不論做人做事，她抱着的宗旨，「只有盡力而為，冇盡如人意」。
20歲那年，阿B遇上人生大關，「我好記得嗰日係星期五，我返返吓工屙血，同事送我入急症室，照咗好多嘢，第二日啲報告出晒嚟，醫生同我講叫我出院先，因為星期日冇人辦公，叫我星期一帶埋父母嚟，因為我未夠21歲，唔可以自己簽紙做手術」。那一刻對阿B來說，恍如晴天霹靂，醫生懷疑她有癌症，需要緊急動手術，「嗰一刻根本冇時間畀我父母諗，因為我生咗個瘤好大，成9厘米咁大，我一邊腎俾個瘤逼到爛晒，一定要割，好好彩個瘤唔係cancer」。
執番條命的阿B，經歷一場大病，決定加入保險行業，「意識到保險對一個病人幾重要」。2004年阿B做過一次補腸手術，2007年又做盲腸手術，到近年她不幸患上甲狀腺病。每次身體有事，阿B都積極面對，萬中無一的事，她再次遇上。「食甲狀腺藥，一千個人先至會有一個對藥有敏感，好似中六合彩咁，我就係嗰一個，食咗兩個星期藥，自己打自己冇晒白血球。當時我喺印度旅行，返嚟即入急症，發燒燒咗3日，已經開始斷片，留醫10日，原來甲狀腺藥同我冇朋友做，醫生同我講，你係咪真係要休息吓呢！」
由保險轉做占卜、命理，皆因時間自由，「我啲兄弟姊妹都移晒民，得我喺香港照顧父母，媽媽係長期病患，日頭係舖做命理，時間可以將就，照顧到老人家，夜晚喺廟街擺檔，日接夜夜接日，可能係咁捱壞咗身體」。2015年媽媽病情惡化，她決定停工，結束做命理的舖位，專心照顧媽媽。翌年媽媽離世，阿B重開寫字樓做風水命理，直至最近因甲狀腺問題，她甚少回廟街的檔位。
年過40的阿B，另一半原本是她的客人，找她問感情事，兩人因而認識，繼而拍拖結婚。阿B這樣形容對方：「佢好神奇，我係霞姨，佢完全唔知唔察覺，後來佢睇返套戲，就話我︰『點解你搞成咁！』」
廁邊擺檔的日子
油麻地的廟街，是香港歷史悠久的夜市，可以說龍蛇混雜，也是平民消閒的好去處。訪問當天的廟街有點冷清，沒有大媽大鑼大鼓唱歌，賣東西的檔口，燈光火着卻只有丁點人流，惟獨在油麻地停車場一帶的紅、藍帳篷，仍有人車爭路畫面，一檔檔求神問津、占卜問卦，總有人走近幫襯。阿B說︰「我好鍾意呢度，我喺呢度成長。」
阿B和師姐的檔口，正正在公廁旁，真是飄來陣陣香，「係臭，但我唔介懷，冇乜所謂，個位我冇得揀，係師傅嘅，我好樂天，去廁所都唔使幾秒，只係我短頭髮，成日畀人誤會入錯廁所」。這些只是小事，擺街邊被人偷東西更是慣常事，「初初都有風扇，俾人偷得太多，偷到好欷歔、好沮喪！你睇我個檔冇燈冇風扇，熱熱吓都熱慣咗，30幾度都係咁，最緊要着長袖衫，唔好着短袖，咁就唔會畀蚊咬」。
阿B的爸爸曾做蔬菜批發，「我3、4歲就喺街度大，嗰時仲要走鬼（免被檢控），喺街頭擺檔，對我嚟講唔陌生，冇所謂啦，搵食箒！」這個龍蛇混雜的地方，女性在此擺檔，難免遇到麻煩事，如收取保護費，「有，多數都係道友，佢哋都唔係好清醒，冇意識」。救護車到廟街也是慣常事，「白車喺呢度好似遊客咁，喺廁所打針、吸毒，飲醉酒打交都見慣不怪，試過有個道友，企咗喺度凌空咁嘅動作，兩個鐘都冇郁過唔跌。」
劈友場面，雖然有，但街道上總有些不明文的規則，「佢哋有佢哋劈，我哋有我哋做生意，好多時唔會打擾到我哋嘅檔口。有次聽到人大聲叫，我睇唔到乜事，排隊嘅客人話劈友，我問客人點解唔走，唔驚咩？客人話因為排到佢。」此時有位叔叔走過來，幫阿B買來了一杯凍飲，「佢係我哋御用『天文台』，以前我哋用大遮開檔，佢幫我哋開檔，畀番少少人工佢。佢𠵱家老咗，唔夠力開帳篷，咪幫我哋買吓嘢食。」複雜之地，街坊鄰里，總是人間有情。
【後記】：黃桂芬墮樓
訪問阿B當日，正是上周三（15日）傍晚，當晚記者到她位於油麻地多層停車場地下公廁旁，她的廟街檔口採訪拍攝。前前後後，擾攘到晚上9時許才離開。沒料記者離開不久，該處發生一宗墮樓事件，死者正是「犯罪家族」主腦黃桂芬。
事後跟阿B談及此事，她見慣不怪︰「你哋走咗冇耐，我都仲未走，聽到消防同救護車聲，呢度成日都有人跳樓，我哋都見慣。呢個停車場冇閉路電視，只係電梯有，我以前泊車喺度，成日都俾人打荷包，你知啦我哋每晚都有現金，打到我都怕，情願泊遠啲。」