任職私人司機嘅陳先生，因為工作關係呢排都喺西半山出入，由朝到晚等接送老闆嘅時候，無意中做埋野豬觀察員㖭！由上星期六到噚日，佢一連4日都見到野豬喺寶珊道沿路垃圾堆搵食，有時係一家三口，有時係單獨行事。陳先生認為雖然野豬平時睇落好馴、冇乜攻擊性，但居民將一袋二袋垃圾擺喺路邊，俾野豬摷到亂晒，好似堆填區咁，影響衞生之餘，亦因為長期有嘢食加快野豬繁殖速度，始終有隱憂，覺得大家應該要正視。
早午晚定時現身
據陳先生連日觀察，野豬出嚟搵食嘅時間同路線都好有規律，通常一日3轉，朝早11點、下晝4點同夜晚7點。好似前日朝早11點，佢見到一隻身長大約4呎半嘅豬公，喺寶珊道沿住條好斜嘅樓梯行落干德道兒童遊樂場，喺花叢聞吓、巡一輪之後又行樓梯上返寶珊道；首先向旭龢消防局嗰邊行，嗰度有個垃圾站，摷完垃圾袋啲廚餘，又掉頭去另一邊嘅垃圾堆繼續搵食，然後沿引水道走返上山。陳先生話下晝好多家傭會喺嗰度放狗，啲狗見到野豬都唔會吠，大家好似見慣見熟。
其實上個月24號，區內有兩個港大研究助理同一個放狗嘅女街坊，喺巴丙頓道近列堤頓道俾一隻野豬襲擊受傷。中西區區議員陳捷貴話當區野豬問題嚴重，據佢哋了解，附近龍虎山郊野公園嘅野豬竇有10幾隻野豬，上次野豬傷人事件，聽講一隻野豬俾屋苑保安員驅趕，受驚之下狂性大發傷人，嗰位女研究助理俾野豬咬傷，身體有10幾處傷痕，傷勢唔輕，仲染咗豬流感。事後漁護署捉到嗰隻傷人野豬，因為佢有病，最終將佢人道毀滅。
陳認為目前要做嘅係控制野豬數量，漁護署現行政策係捉到野豬幫佢哋絕育後再野放，成效未必咁快見到。佢提醒巿民唔好好心做壞事，走去餵野豬；其次就係要用啲可以鎖定喺固定位置嘅垃圾桶，防止野豬撞冧垃圾桶摷嘢食。另外係有關方面可以試吓喺野豬出沒嘅熱點，加裝紅外線警報器嚇走佢哋，等佢哋走返上山。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。