盛傳代建制派出戰九西補選嘅食衞局局長前政治助理陳凱欣，有建制社團大灑金錢幫佢力谷知名度，單係喺紅磡世界殯儀館後成座樓咁高嘅宣傳廣告，真係名副其實引死人，連民建聯蔣麗芸都想book嚟做宣傳！不過有意參加九龍西補選嘅劉小麗，自然冇陳凱欣、元秋咁有北京大水喉射住，面對唔公平競爭，劉小麗話最緊要都係自己要爭氣，搵辦法對抗霸權，實行以民間力量對抗金錢政治。
有別於陳凱欣打出健康旗幟，周末、日落區四圍遊避談民生爭議，劉小麗幾乎日日落區開站同街坊接觸，了解區內民情訴求。既然冇保皇黨咁有錢，小麗團隊誠邀市民幫忙「集氣」，若然有小店可以借出小小宣傳位、私家車或貨車願意貼佢哋嘅宣傳品、兼有外牆可以借出，歡迎同小麗團隊聯絡 ，合力對抗以錢打造嘅「高牆」。
佢哋同時招募緊義工，希望有更多人同行，齊齊喺年底補選，打一場硬仗。
元秋見廣告位「下次book」
小麗用民間力量宣傳，但陳凱欣呢個引死人宣傳位，對有錢建制派嚟講其實好吸引！好似八方今日見到九西議員、民建聯蔣麗芸時，都問下佢點睇陳凱欣被指搶閘宣傳，使唔使計選舉經費啦？點知元秋直言佢「真係唔知」；被追問陳喺「高牆」賣廣告有冇問題時，元秋則指：「我未睇到啊！係咩？咁我研究吓，然後再話畀你哋聽！」咁記者就攞出手機，遞陳凱欣嘅廣告畀元秋睇，元秋睇完就問嘞：「使唔使錢啊？」有記者話起碼幾十萬後，佢就同助理話：「睇吓下一次幾時有位，下次我book啊喂！」
李八方