冇咗基斯坦奴朗拿度（C朗），好彩皇馬仲有加里夫巴利！禮拜日皇馬新帥盧卡迪古西甲第一場，主場鬥同市嘅基達菲，由於上場歐超盃皇馬加時2:4輸咗畀馬體會，所以皇馬將帥唔係冇壓力㗎！結果皇馬憑丹尼爾卡華積同加里夫巴利上下半場各入一球，以2:0輕取基達菲，總算向外界證明球隊就算冇咗C朗同施丹，「銀河艦隊」一樣冇問題！
卡華積+巴利=2:0
其中今場表現最搶鏡嘅、肯定係現年29歲嘅巴利，呢位威爾斯球星喺C朗在陣時鬱鬱不得志，今季仲唔把握機會證明自己，自季初嘅國冠盃賽事起，巴利近六場賽事入咗四粒，狀態非常火熱，成為C朗離隊後皇馬最可靠嘅得分點。開賽僅四分鐘，巴利就接應長傳突破越位起腳，皮球直飛遠柱上角，但畀對方門將大衛蘇利亞飛身撲走；踢到16分鐘，馬些路左路傳中，巴利唔錫身飛身搶點爭頂，皮球「砰」一聲中楣彈出，已向對手發出警號。既然上半場腳風暫時唔順，巴利就轉去左路搵食，20分鐘巴利勁力傳中，基達菲門將個波打出，後上助攻嘅右閘卡華積隨即施展頭槌，將個波笠頂入空門，幫皇馬半場領先一球。
下半場51分鐘，擔任「假9」嘅馬高阿辛斯奧發難，運球帶至左路傳中，伏兵遠柱嘅巴利近門左腳勁抽，對方門將撲到都照入，幫皇馬鎖定2:0勝局完場。賽後皇馬教練盧比迪古就大讚球隊表現：「我對球隊贏波感到高興，巴利踢咗場好精采嘅比賽，但我想將重點放喺整支團隊上，我認為球隊需要唔同特點嘅球員，我對球員嘅表現都十分滿意。」
入座率創10年新低
雖然巴利喺球場上表現足以填補C朗位置，不過球迷嘅心似乎唔容易挽留，畢竟球隊頭號球星出走，又冇大牌球員加盟，搞到皇馬今場西甲第一擊只得48,446人入場，創下自2009年以來銀河艦隊西甲最低嘅入座率。
