單車喺馬路車罅之間駛出，仲突然噴火花着火，唔知仲以為拍緊單車版《幽靈車神》（Ghost Rider）電影㖭！前日夜晚10點鐘左右，讀者黃先生揸車駛經九龍城廣場對開嘅賈炳達道，排喺袋口位第二架車準備右轉獅子石道，其間一個男人踩單車喺佢左邊車罅駛過，當時黃先生聽到單車發出「啪」一聲，車頭隨即噴火花起火焚燒，黃先生即時反應：「嘩，做咩事呀？」單車男即刻扭左喺行人過路處鏟上行人路停車，行人路上面嘅途人見到着火單車衝埋去，嚇到爭住走避，至少兩個途人跌倒。
單車男趕緊落車，過程只有大約短短10秒，黃先生唔排除單車男燙傷手，不過佢要開車走，睇唔到之後點收科。佢懷疑單車上面有電子設備起火，車cam片中所見似係單車車頭加裝嘅大燈起火。