絕大部份人都感覺到大灣區係特區政府重中之重，睇吓特首同司局長頻頻到大灣區考察，開口埋口係大灣區有幾多機遇，就知道呢項國策要娥班子瞓身推動。據知民政事務局局長劉江華稍後都會帶團遊大灣，起碼都喺呢方面有啲功課交。
邊啲人獲享「禮遇」，可以同劉江華把臂北上遊大灣？之咪就係政府地區護航「好拍檔」，18個區議會正、副主席囉！八方聽聞呢個團預咗三日兩夜，7號起程、9號返港，除咗劉江華做團長，民政事務總署署長謝小華都會隨行，行程細節尚待落實，唔知會唔會響應財政司司長陳茂波呼召，去埋恩平浸溫泉？而北京雖然推出居住證，但唔少有意北上發展港人最在意嘅係交內地稅嘅安排，據知政府同政黨繼續力推，唔知稍後有冇更多消息？