娥特上周五破天荒玩fb直播，其間話睇唔到取消每日150個單程證名額嘅理由，又話呢批新來港人士有助令香港人口「年輕化」，惹來網民群起畀嬲。
新民主同盟區議員譚凱邦噚日同傳媒茶敍，引用統計處數據反駁娥特，指香港回歸至今年年中，按年持單程證來港人士數目已經超過100萬人。
對於娥特話呢批單程證有助改善香港人口老化問題，譚凱邦唔認同，佢話睇過統計處2016年單程證入境者數據，發現呢批人士年齡層分佈同香港人口一貫年齡層分佈好接近，當中45歲以上嘅多達13,075人，佔該年持單程證人口23%。佢強調單程證已對人口承載量響起警號，再重申話政府若要真正解決房屋問題，就要先減少單程證人士來港，令香港土生年輕人可以更易租樓同買樓。