雖然立法會九龍西補選11月底先舉行，但建制派透過九龍社團聯會出面，「冊封」盛傳為建制出戰嘅食物及衞生局前政治助理陳凱欣做「健康大使」，借機為佢提早拉票宣傳。之前已有報道話九西周街係陳凱欣大頭嘅橫額、直幡，同小巴廣告，今次最新宣傳搞作係成座大廈咁高嘅陳凱欣巨型海報。有民主派人士話，計計埋埋呢筆宣傳開支最少幾十萬甚至近百萬，如果咁都可以唔計選舉開支，真係令人質疑囉！
「亞運概念」完晒繼續搞
話說噚日有人係紅磡見到一幢單幢樓外牆，掛咗成幢大廈咁高嘅陳凱欣巨型廣告，陳凱欣個頭鬼咁大，一出紅隧離遠見到，雖然隻字不提選舉，目的呼之欲出。有民主派估計呢個大廈外牆廣告，冇10萬8萬都落唔到樓。
八方問過一啲廣告界中人，佢哋話紅磡呢個位點止10萬8萬，最少都30到50萬一個月，佢話紅隧出口廣告牌，以每幾塊一組計，都要過百萬一個月，陳凱欣呢個位冇幾十萬根本買唔到。假如再計埋數以百計橫額、直幡，每張要兩三百蚊、仲有每6個月以萬元計每條小巴線車身廣告，有民主派計過九龍社團聯會最少喺陳凱欣身上用咗50萬以上，隨時可高達近百萬。仲有TVB安排佢上《今日VIP》節目，話就話宣傳佢間社企「好聲」，其實為乜已經好清楚，泛民人士邊有機會。如果呢筆宣傳費可以唔計選舉開支，以後民主派仲有得同建制派公平選舉？
八方又問過聯會，負責人馮小姐回覆，「活出健康」係今年聯會趁亞運會檔期推出嘅新活動，未來仲有10幾個大型活動會搞，但拒透露係乜類型同性質，離奇嘅係亞運會9月結束之後，活動都繼續搞，一路到年尾，即係搞到補選時箒，用意相當明顯。至於呢壇旨在宣傳陳凱欣嘅活動，總共使費係幾多？馮小姐就話唔方便透露活動開支，又強調陳係義務擔任大使。係嘅，如果呢壇活動要計入選舉開支，相信一定達爆煲邊緣。
李八方