食一餐一萬蚊嘅海鮮餐，找數變double？讀者吳先生今個月3號同7個朋友去佐敦廟街竹家莊食海鮮，埋單盛惠10,511蚊，佢用星展銀行銀聯提款卡找數，即時喺1分鐘內收到銀行發出兩個短訊，都係指佢個戶口被扣數10,511蚊。吳先生覺得奇怪，即場登入網上銀行睇交易紀錄，發現有兩筆相同金額嘅扣賬，佢即刻問食肆係唔係扣多咗一次錢，但職員話只有一次交易。吳先生第二日向銀行投訴同要求退款，但銀行同食肆互相推卸唔認數，嗰10,511蚊究竟去咗邊？
星展：收到銀聯兩個扣錢指令
吳先生當晚同朋友大擦海鮮，包括鮑魚、蟶子、瀨尿蝦、魚蝦蟹、螺、蜆同其他小菜酒水，10幾道菜中最貴嗰碟就係椒鹽瀨尿蝦，8隻要4,158蚊。吳先生話耐唔耐都會同朋友去食飯，對價錢冇異議，佢張提款卡亦都用咗好多年，估唔到會發生扣多錢嘅事。
就呢件事，吳先生向銀行投訴，銀行上星期四發信回覆佢指商戶嘅扣賬紀錄正確，拒絕吳先生提出嘅退款申請。直至噚日，銀行又聯絡吳先生，話紀錄顯示嗰間食肆有兩筆相同金額嘅交易，係兩個唔同交易編號，建議佢向食肆查詢。竹家莊嘅楊經理回覆《蘋果》稱，經已聯絡食肆所用嘅銀行查數，證明當晚的確有兩次10,511金額嘅交易，但其中一筆被拒絕，即係佢哋只係收咗客人10,511蚊，已經同事主交代咗唔關食肆事。
星展銀行回覆《蘋果》就話仲調查緊件事，根據紀錄銀行收到兩個銀聯嘅指令，所以扣咗客人兩次錢，其中一筆交易已證實冇問題，所以銀行日前發信畀客人解釋嗰一次交易拒絕退款嘅原因。至於另一筆交易，銀行仲同銀聯了解緊，會同客人保持聯繫，盡力提供可行協助喎。金管局發言人指銀行正同客戶跟進個案，並要求銀行設立適當及有效嘅投訴程序，若客戶認為銀行未有妥善處理個案，可以考慮向金管局投訴，局方會適當跟進。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。