巴塞隆拿上周六喺西甲旗開得勝，喺魯營以3:0擊敗艾拉維斯。今仗梅開二度嘅新任巴塞隊長美斯，喺比賽中又達到另一個里程碑，助球隊射入隊史上嘅第6,000個西甲入球。
美斯今仗喺64分鐘替巴塞先開紀錄嘅罰球，係球隊歷來喺西甲所入嘅第6,000球。連同菲臘比古天奴同美斯之後所入嘅第二球，巴塞喺西甲共入6,002球，係聯賽史上僅第二隊入球突破6,000大關嘅球隊，另一隊係目前已入6,041球嘅皇家馬德里（未計周日戰果）。值得一提嘅係，美斯喺2009年亦曾經射入巴塞喺西甲史上嘅第5,000球。另一方面，巴塞喺西甲史上所入嘅6,002球當中，有385球係嚟自美斯，佔總數6.4%，美斯對巴塞嘅重要性，真係不言而喻。