八方細個時打機，經常俾父母指浪費時間，家陣唔同喇，電競成為產業，少年警訊都聯同港大專業進修學院搞電競課程先導計劃。警察公共關係科（PPRB）警司黃冰冰向八方講，有6個學員會到印尼耶加達亞運做義工，吸收大賽經驗，希望早前成立嘅「少訊電競隊」可參加2022年杭州亞運電競賽。
與港大合辦課程
PPRB高級警司余鎧均指，電競課程內容由港大專業進修學院主導，期望年底再辦，長遠目標係恒常化，但為免影響學員返學，會在暑假、聖誕假辦。PPRB高級督察鄧德陽話，課程有40名、16歲至25歲學員，當中有48小時課堂教學、8小時實習，費用全免。
港大專業進修學院電競課程中心副主任陸傳傑表示，為少訊辦嘅課程屬資歷架構第二級認可，着重實踐，「講多啲實際點操作，學術理論嘢會少啲」，佢話學員對做電競主播最感興趣，「例如電腦壞咗、選手喺比賽期間投訴、賽事中斷時，主播點執生」。
學員子昇表示，最深刻是學習轉播賽事，「上堂有同學玩遊戲，跟住就即場學點轉播」。希望未來向電競行業發展，特別是賽事策劃方面。