無論幾時，都唔好亂咁過馬路，尤其農曆七月流流，嚇親司機可大可小，網上流傳一段「觀塘繞道現鬼影」嘅片段，片中所見有車輛喺觀塘繞道行行吓，旁邊有個人影飄過，唔通真係嗰味嘢？
由車cam拍下嘅片段長23秒，據知件事係上周三晚9點幾發生，有司機沿觀塘繞道出旺角，緊隨前方一部藍色私家車，經啟德郵輪碼頭對開橋面時，前方藍色車右邊近路中石壆，出現咗個人形黑影，黑影仲好似飄飄吓咁，一直去到片主座駕右邊。
上載片段嘅網友直言係轉載片段，但片段就大字標題話「奇景系列」。其實今年5月觀塘繞道都發生一單奇聞，有位72歲婆婆疑迷途，喺繞道橋面散步，嚇壞唔少途經嘅司機，今次會唔會係同類事件呢？都係嗰句啦：幻覺嚟嘅啫，嚇我唔倒嘅！