立法會10月中復會後，財委會就有場硬仗要打，就係審議造價達5,000萬、喺觀塘海濱長廊興建嘅音樂噴泉嘅建議。如果大家好記性，應該會記得其實工務小組喺6月嘅會議中，因建制派在席不足否決呢項撥款。點知當局霸王硬上弓，不足一個月後將項目再提交小組，呢次喺建制派坐定定護航下過關。
落區擺檔收風
有民主派相信，民意始終都係最重要嘅因素，希望喺暑假收集街坊意見，力促當局回心轉意，可以收回撥款申請。本身為九龍東立法會議員嘅公民黨譚文豪（Jeremy）就主動收集民意，呢排除咗落區擺檔向街坊直接收風之外，佢仲製作咗個網上民調（ https://goo.gl/forms/UQQAK1tK5zl9iBGw2，或到facebook「譚文豪Jeremy Tam」），問吓觀塘嘅居民，興建噴泉會唔會令區內人流過多、交通更逼？又或阻礙遊人喺草坪上休憩？又會問問相較起噴泉，公帑係咪應該用於改善民生嘅項目？如果係，咁長者眼科牙科資助、醫院穿梭巴士、幼兒託管服務同社工外展服務，市民又會揀邊樣呢？
Jeremy話呢個係九東居民發聲反對嘅最後機會，希望區內居民可以齊齊表態，睇吓可以點樣善用呢5,000萬。
李八方