A語B：你舊時條仔搵到個離岸水魚喎，曾經紅過，隨時疊水㗎……
B答A：咁就好囉，都借咗好幾年嘅錢，可能有機會收返呢？
A：你借幾多錢俾人啫？
B：識咗幾個月，即開口借幾廿萬；問乜原因？幾簡單啊答得：「玩大咗，又咭數，又財務公司欠債，連自己公司都提早借糧，個個月光還利息都幾乎唔夠，家用都冇得畀……即係：月光族！」
眾人冇問呢個係乜嘢人，反而掉轉槍頭：喂，阿乜水，你係乜嘢人嚟㗎？根本唔係人，係水魚喎！
A：好心啦，人地泊咗新碼頭，好心大方啲，畀人地過得開心啲啦……做Sugar Daddy你估唔使付出咩？
本來笑着你一言我一語鬥無聊，點知「Sugar Daddy」一語既出，收不回來即時火藥味濃。B恨透「Sugar Daddy」呢個尊號。
B：講乜×嘢啊你？呢度冇人咁冤大頭想做人Sugar Daddy，以為講心㗎，點知遇到個騙子。閣下富貴冇所謂，在下一分一毫都係勤儉搥石仔積累，每個斗零都有血有汗，一心幫朋友無所謂，卻幫了個騙子，千萬個唔抵。
C幫口：算啦，相識一場，當買個教訓囉……
B：傻的嗎？你需要咁嘅教訓咩？你有資格得到呢種教訓咩？
自己原本保持沈默，見眾人你一言我一語，不斷勸B大方，勸B好來好去，勸B當買個教訓；根本個個扮好人，卻完全沒從B的角度去審視整段所為感情！也有人知道B的前度一而再、再而三，故技重操，騙過的人何止三個？他們明白B爭持不是錢被騙去，而是傷在被騙情？
旁觀者人人明哲保身，做「客觀專家」，卻沒嘗試站在B的位置審視。對該名騙子作法略有所聞的朋友，以為保持沈默人上人，卻硬生生將B推上被搵笨，騙子事後扮演「被拋棄」向外界數盡B的不是，世人偏好可憐「弱者」，都戴上有色眼鏡去看鱷魚頭老襯底的B；叫B如何沈得住氣？簡直七孔生煙！幾年前，沒先兆，對方突然向B提出分手，先自承認欠債（那信息傳到B的手機，還有記錄 ）：「欠閣下之數十萬元，將盡快清還」。以為對方也非拆白黨，好來好去，無謂逼人，由他籌款慢慢還。幾年過去，屁也沒放一響，騙子卻四出放聲氣，指責B貪新忘舊，遇新歡即拋棄。
B至難忍不是金錢被騙去，更絕對吻合和事佬所指：冇咗呢幾廿萬，你冇飯開咩？有飯開關人七事？有飯開值得縱容騙子予拿予取？事後四出造謠？當然B的一些所謂朋友們，不過一直將他利用，從沒當他是朋友，純粹搵笨實。無可申辯，B就是笨實！