葡萄牙球星基斯坦奴朗拿度（C朗）今季空降意甲加盟祖雲達斯，做慣王者嘅C朗目標梗喺攞冠軍啦，可以做埋神射手就仲好！不過上個禮拜六C朗意甲「地標」戰，作客弱旅基爾禾諗住好易食，點知C朗施展渾身解數，頭頂腳踢全場八次射門都冇波入，仲幾乎因為犯手球做埋球隊失分罪人；好在祖記勝在兵力強勁，靠後備上陣嘅貝拿迪斯治補時入波以3:2絕殺對手，總算為C朗出征意甲打響頭炮。
話晒今場都喺C朗意甲初體驗，波飛就一早賣晒㗎喇，聽講當地警察仲安排埋反恐部隊喺球場附近駐守，睇得出意大利方面對今場波幾咁重視。先講祖記今場嘅排陣，誠意非常十足㗎！保羅戴巴拿、古達度同杜格拉斯哥斯達都出齊，支援企喺最前嘅C朗。
一開波祖記就有個好開始，中場基迪拉三分鐘就入咗粒，心諗呢場仲唔係一場大屠殺？身邊嘅意甲專家仲話8:0都似，貼咗下盤輸梗喇，點知C朗上半場有幾次機會，唔係射高就射斜，之後仲要畀基爾禾偷雞執番粒完半場。
八射冇波入艾基利收貨
下半場一嚟，祖記另一新兵祖奧簡斯路仲要輸多球12碼，畀舊將基亞卓尼利破門反超前2:1。呢個時候，祖記即時換入文迪蘇傑同貝拿迪斯治狂攻啦，其中C朗曾經頭槌攻門同射遠柱，睇住入硬都要俾對面39歲嘅門將蘇蘭天奴撲走，好在對手喺75分鐘擺老烏踢成2:2，去到完場前，文迪蘇傑仲頂咗個波入網，不過同門將炒埋一碟嘅C朗就因為犯手球在先，球證睇完VAR就判入球唔計數，激到C朗紮紮跳！好彩祖記後備兵貝拿迪斯治左下半場補時入多球，C朗首戰先唔使失威咋！
賽後祖記教練艾基利就話好滿意C朗嘅表現，仲話C朗今場冇波入只係唔夠運；著名教練沙哲朗尼亦都話，就算當年柏天尼登陸意甲，都要多少時間適應。大家一於畀多少少時間C朗啦！