巴士後座女乘客接聽來電，哽咽着。距離太近無辦法唔竊聽，個師奶喊咁口說「死火，阿仔落晒定但層樓沉降喎，撻定好傷，我們儲埋的血汗錢無晒，呢次點死呀。」愈聽愈痛，心諗兩母子九成買了土瓜灣樓。「沙田第一城呀！」師奶語音剛落，半車乘客跟我一樣愕然，點會係第一城？「真係，蘋果日報登㗎。」我個心離一離。「左丁山寫出來㗎！」即刻搜尋名采，見上周五左丁山引述地產和工程界朋友，聲稱沉降係傳媒大驚小怪，指第一城82年入伙後第一期不斷沉降，就是近城門河那邊的大單位，門口有兩三級樓梯。當年大量灌漿興建這兩三級樓梯補救，眨吓眼三十幾年。個工程界因而認定，沉降唔難救，只係議員與傳媒唔識嘢，令建造界士氣低迷，云云。小市民像巴士這位女乘客，冇工程高人指點，冇地產朋友教路，半生積蓄買着沉降地段的樓宇，點會你OK我OK！而沙田第一城搞掂沉降，唔代表沙中線搞得掂。那些年的1982，完全唔係蒙在鼓裏的2018！沙田第一城灌漿，沙中線一直對外灌水！沉降，比港獨更迫在眉睫不是嗎？點解救，發律師信OK？收皮啦！